| Descripción
| Construído no século XVIII, este templo de planta rectangular presenta "dous corpos rectangulares engadidos a ambos os dous lados da cabeceira e un terceiro, que funciona como sancristía, engadido ao muro meridional da nave. Os seus muros son de carga, cunha cuberta a dúas augas en cada un dos corpos e catro no correspondente ao presbiterio, todos eles con cubrición de tella curva. Interiormente, os espazos da nave e do presbiterio delimítanse por un arco triunfal. O presbiterio posúe maior altura cá nave, o que transluce un desexo efectista de remarcar o seu sentido relixioso, e cóbrese por medio dunha bóveda de aresta, mentres que a estrutura aérea da nave resólvese nunha bóveda de canon. No seu interior ábrense fomelas coa función de acubillar diferentes imaxes relixiosas. Os muros preséntanse revestidos e pintados de branco, agás esquináis e recercado de ocos, que presentan granito visto. Cara o exterior, o edificio posúe unha rica volumetría, proveniente das diferenzas que presentan cada un dos seus corpos. A ornamentación concéntrase na fachada principal, revestida e branqueada, agás esquináis e recercado de ocos. Nela, e no seu eixo vertical central, superpóñense unha porta rematada en arco de medio punto, unha ventá rectangular e, interrompendo a comixa, unha espadana de dous ocos rematada en pináculos con bola. Todos os elementos estrutúranse en razón da busca da simetría que abarca todo o conxunto."
|
|---|
